中環出更：善用廚餘 永光振彬都咁惜食
自從惜食運動推行之後，好多港人都留意多咗自己嘅飲食習慣，食幾多叫幾多，唔做大嘥鬼，但有時無可避免都會有廚餘。環境局尋日搞咗個惜食運動巡迴啟動禮，向多間參與咗廚餘減少約章計劃嘅商戶頒發感謝狀。卓妮見到身兼惜食督導委員會及工商業界良好作業委員會主席嘅信和置業執董黃永光（Daryl），原來佢同觀塘區議會主席陳振彬（Bunny）都在家中設置廚餘機，方便處理家中廚餘。
Daryl話，佢屋企部廚餘機唔算太大部，唔嘥位之餘用落又冇特別異味，所以一用就用咗四年咁耐。而佢太太就因為唔鍾意佢同囝囝食剩嘢，所以平日煮飯分量拿捏得好準確，但假如都係食剩，就會留番下一餐再食，直至食晒為止。咁部廚餘機咪好少用得着？Daryl就解釋，就算冇食剩餸，都會有食物殘渣，好似囝囝鍾意食魚同雞翼咁，啲魚骨同雞翼骨都可以放入廚餘機分解。
化肥種菜收穫豐
至於嚟緊就到大閘蟹季節，講起好多人都鍾意食完蟹膏唔食蟹肉，Daryl就話呢件事唔會發生喺佢身上，事關佢對有殼海鮮容易敏感出疹，所以都好聽醫生話盡量唔食喎！
Bunny一樣咁環保，自從兩年前有個朋友送咗一部廚餘機畀佢後，佢就開始咗種植嘅習慣，又在天台添置六個三呎乘六呎嘅大盆，利用廚餘機分解出嚟嘅肥料栽種菜心、芥蘭及粟米等唔同種類蔬菜。佢仲話，太太同兩個小朋友各負責一盆，而佢自己就照顧三盆，分工合作。雖然粟米嘅收成比較差，但其他蔬菜嘅收穫就令佢好滿意，有時仲多到食唔晒，可以分畀左鄰右里及朋友分甘同味。
卓妮