泛民主派飯盒會新任召集人梁家傑（袋巾傑）尋日同傳媒茶敍，話有心理準備中央會出動坦克車驅散佔領中環（佔中）示威者，又話唔排除警方會喺佔中後低調通緝有份參與嘅泛民議員，再喺投票前夕拘捕眾人，令佢哋唔可以就政改方案投下反對票，令政改得以通過喎。不過，有知情人士就寸爆袋巾傑根本唔掌握情況，噏得就噏。
據了解，泛民中人的確討論過呢個問題，擔心政改投票時，有機會唔計算被捕議員在席喎。不過，有知情人士就話，《基本法》寫明政改方案需要全體議員嘅三分之二支持，即係要四十七票投贊成票通過，如果拉晒班泛民議員，政改方案根本冇可能通過，反而泛民議員坐定定喺度，仲可能有機會轉軚投贊成票。
另外，會計界議員梁繼昌（Kenneth）日前以問卷訪問約一千二百名會計師公會會員，六成七受訪會計師不滿政改方案框架。Kenneth形容政改方案「垃圾」，又話就算業界叫佢「袋住先」，佢一定唔會聽喎。既然佢早已鐵定反對政改方案，咁仲諮詢業界做乜呢？