政情：收料站：民政署抗佔中 10‧1包起維園
民陣早前代「佔領中環」向警方入紙，申請在十月一日由維園遊行至中環遮打道，政界流傳遊行後就係展開代號「去飲」嘅佔中行動。我哋尋日收到消息，政府絕無僅有在當日下午四點半鐘，喺維園六個足球場搞「繽紛大派對」。政府提早預訂晒維園六個足球場，相信係想打對台抗衡佔中行動。
罕有辦大型戶外派對
睇番大派對張請帖，係由民政事務總署署長陳甘美華邀約，根據請帖中地圖顯示，當日會喺四號足球場舉行儀式，並由民政事務局局長曾德成主禮，活動會場就劃晒六個足球場。有收到請帖嘅政界中人話，以往十．一政府都係去灣仔會展搞吓酒會，戶外大型活動通常都係由工聯會或社團主辦，所以今次收到請帖都覺得奇怪。
民陣召集人楊政賢聽到消息後，話早前知道九月廿八日嗰個星期，維園已經有人預訂咗足球場，但慨嘆點都估唔到係政府主動出手。佢話此舉顯示政府有幾驚群眾運動，加上建制派預訂政府總部東翼到十月底，係要營造歌舞昇平效果。不過，亦有人話，佔中重點係終點，起點唔喺維園足球場，咪轉去草坪、銅鑼灣東角道囉，睇嚟今次陳甘美華又係成事不足喇。