政情:李國章同大學生鬥小學雞

曾任中文大學校長及教育統籌局局長嘅李國章,日前向擬罷課學生開火,批評佢哋嘥時間同做騷,反建議佢哋索性退學,讓出學位畀副學士學生升讀喎!玩到退學咁大,中大學生會即日發表公開信還擊,慶幸李國章唔係現任校長咁話。李國章尋日反擊,質疑學生罷課只係唔返學「瞓耐啲」,唔算係犧牲同有承擔,仲逐一反駁中大學生會封公開信,雙方真係「小學雞」到冇人有。

因為「退學論」而成為學界眾矢之的嘅李國章唔覺自己講大咗,尋日出席活動後再度開腔回應,佢話大學生成日「走堂」,所謂罷課其實只係唔返學瞓耐啲,着學生唔好再做騷,如果真係要犧牲,就要畀人睇到佢哋有承擔,退學咪有承擔囉!佢又話,要表達不滿有好多種方法,例如出席論壇、甚至幫助他人。學生唔開心就要透過幫助別人去發洩,認真聞所未聞喎。

李:應該叫我做教授

對於公開信要求佢收回言論,李國章寸爆學生係「小朋友」,非常可愛但「好情感化」,認為同「小朋友」對罵冇意思。佢其後再次沉唔住氣,三點反駁公開信內容,包括學生稱呼佢做「先生」係唔恰當,自言假假哋都係該校榮休教授,學生理應尊重自己學校喎。身兼行政會議成員嘅李國章,又否認自己喺香港電視發牌決定上有任何責任,仲自誇係「三三四」學制嘅功臣添!

中大學生會:你唔配

中大學生會會長張秀賢(Tommy)驚聞呢位前校長回應,直斥對方太「小學雞」,逐點反駁佢日前嘅言論根本唔係教授所為,唔值得被尊稱「教授」。佢又話李國章作為行會成員,即使避嫌冇開會處理港視發牌決定,亦要體現行會集體問責制,盡政治責任。佢又質疑李當年時任該校醫學院院長時,有份反對中大學制「四改三」,點解唔即時辭職以示抗議?其實佢咪又係逐點反駁李國章,二人對陣根本好似老雞對幼雞,一樣咁「小學雞」囉!

第一手消息請下載on.cc東網iPhone/iPad/Android/Windows Phone Apps