中環出更：張宇人：財會每周只開四粒鐘
立法會下月就復會，率先登場嘅係內務委員會及財務委員會（財委會）。
睇番上年度財委會，最後兩個月因為新界東北發展規劃前期工程撥款「拉布」而不停開會，最後一刻先至通過瑪麗醫院重建等民生議題，但仍累積近二十項議程未搞掂。
由於建制派協調咗新一年度財委會將由飲食界張宇人（Tommy）揸莊，所以Tommy未正式當選做主席，就急不及待同政府非正式討論過來年財委會會議安排，講到明每星期嘅財委會只會開會兩節共四小時，即係議員個個都可以喺七點幾收工，佢話係為咗平衡處理累積嘅議程同議員「拉布」喎。咁佢驚唔驚激進泛民「拉布」？佢就話冇得驚。
料先討論廚餘回收中心
至於累積近二十項議程中，包括「三堆一爐」、創新及科技局開位等爭議事項，所以點樣調動議程，都幾考政府腦筋。Tommy認為，政府會首推早前中止待續嘅小蠔灣廚餘回收中心，皆因廚餘回收中心已經因為「拉布」延期，如果再唔提出，造價會再上升喎。
卓妮