中環出更：囝囝搞科研 胡曉明轉行力撐？
早前一個瑞士名錶品牌舉行一百周年盛宴，城中名流爭相去沾喜氣。菱電發展主席兼城市大學校董會主席胡曉明（Herman）同太太梁子慧帶埋細仔胡正忠齊到賀。Herman透露，兒子仲讀緊書，主修生物科技。咦？Herman父親胡法光綽號係「電梯大王」，唔通到咗第三代就轉行唔接手家族生意？
Herman聽罷笑稱：「係我轉行先啱！」原來佢打算等兒子發明新生物科技後揼本投資，呢位富爸爸認真唔話得。當晚到場政商名人川流不息，包括鐘錶界老行尊孫秉樞、上海總會理事長王緒亮夫婦及金銀業貿易場前理事長李德麟夫婦等人，主人家華明行集團董事長高叔平夫婦、大仔香港鐘表業總會主席高鼎國及細仔香港表廠商會副會長高偉國齊齊招呼賓客。
高叔平七十大壽 全家齊賀
高叔平話，當年佢外父李惠利創立鐘錶生意引入瑞士英納格，後來索性收購埋品牌。佢廿六年前接班，至今仍然做緊掌櫃，打算未來五年慢慢交棒，佢仲笑笑口話依家要兩個仔接生意畀佢做喎！當晚家人仲準備咗一個大蛋糕歡賀高叔平七十歲生日，現場氣氛好溫馨。
人稱「趙樓神」嘅長實集團執董趙國雄都有到場湊熱鬧，講起歐洲央行減息實行量化寬鬆政策，佢話咁意味本港短期內唔會加息，仍然睇好樓市後市。咁佢嘅投資策略係咪繼續買樓？趙樓神笑笑口話，早已有樓收租，反而間唔中都買吓股票、名錶咁啦！講到買錶，佢好雀躍話早前預訂咗一枚值得收藏嘅名錶，仲話新貨到手時要畀卓妮開吓眼界喎！
卓妮