政情：暑假少陪老婆 樹根被詐型
立法會放暑假係議員離港旅行「充電」嘅好時機，議員鍾樹根都唔例外，唔係去加拿大，就係去澳洲墨爾本，但佢唔係去遊山玩水，而係去拜訪當地議會。雖然樹根好勤力，但都被太太詐型，話成個暑假流流長，竟然冇陪吓佢去旅行，搞到樹根本月初去湖南參觀訪問時都特登帶埋太太一齊去補數。
樹根本月初同大約六百位港島各界人士去咗湖南長沙參觀拜訪，雖然只係短短三日行程，但佢都帶埋太太去，仲一齊參觀咗有中國古代四大書院之一嘅岳麓書院、愛晚亭等名勝古蹟。去到湖南，又點可以唔品嘗一吓中國八大菜系之一嘅湘菜呢？不過，湘菜以辣著稱，樹根就唔多受落，仲話自己係地道嘅廣東人，唔好辣嘢，所以佢喺當地餐廳食嘢時都特別叫大廚要走辣喎。