政情：勞界接班人 工記五爭二
立法會三個勞工界功能界別議席，一向都係由工聯會（工記）同勞聯「二一分」，而工記內部規定本身兩個議席只可做一屆，所以完成四年任期後就要換新人上位。雖然距離一六年立法會選舉仲有兩年，但有消息人士話，工記近期已開始物色下屆勞工界議席嘅接班人，同今屆一樣，佢哋都係推薦本身嘅區議員出選，據聞目前有五人榜上有名，打崩頭爭奪兩個議席，唔知最後邊兩個會跑到出嚟呢？
據聞首名人選係元朗區議員陸頌雄，佢由○三年起當選至今，算係資深區議員，跟過雙料議員麥美娟參選立法會直選，佢係關注年輕人置業問題組織「蝸居部落」召集人，出鏡率都唔少。第二位人選係葵青區議員梁子穎，佢亦係中學教師，喺聖公會林護紀念中學教理科，○七年起當選區議員，兩年前跟過陳婉嫻（嫻姐）條隊選超級區議員，依家擔任公共事業監察組召集人。
以四項標準挑選代表
至於餘下三位人選則是觀塘區議員簡銘東、何啟明及黃大仙區議員莫健榮，三人都跟過九龍東議員黃國健參選立法會，簡銘東同莫健榮都係○七年當選區議員，同現任勞工界議員鄧家彪都係同屆新星。何啟明就係一一年先當選區議員，係議會資歷較淺嘅一位。消息人士話，呢五位人選都加入咗唔同工會，工記對佢哋都好信任，並會根據四項標準，即「端正心態」、「基層和勞工意識」、「過往貢獻」及「未來發展潛能」來挑選代表。
至於現任兩名勞工界議員，其中身兼東區區議員嘅郭偉強，如果嫻姐唔連任，由王國興頂上，郭偉強就順理成章接班選港島區。不過，身兼離島區區議員嘅鄧家彪，由於新界西已經有麥美娟，所以佢好大機會轉戰新界東，仲打算喺大圍港鐵站附近開辦事處添！
傳鄧家彪轉選區被拒
不過，聽聞鄧家彪想連帶轉去新界東選區議員，但黨內就覺得「一動不如一靜」，費事搵人替佢，擔心佢去新區選輸就弊喇，睇嚟佢只能繼續做新界西區議員，但又選新界東立法會議席，唔知佢顧得邊區呢？