中環出更：公民廣場重開 保安「執到正」
政府總部東翼前地「公民廣場」加建金屬圍欄重開後，保安明顯加強，就連處理請願示威都「執正嚟做」。話說尋日講過民主黨本來想去「公民廣場」抗議坑渠油事件，但就唔准進入，於是改喺閘口請願。
未經批准 不准示威遞信
行政署就聲稱未得署方批准，唔應該用東翼前地進行公眾活動，又話政總啟用以來，東翼前地都係通道，情況由啟用至今大致相若，只係未講埋「公民廣場」個名係外界作出嚟嘅啫。
記憶所及，以往東翼未起圍欄前，唔少團體都走入去抗議及遞交請願信，其中一幕就係行政立法兩會議員葉劉淑儀嘅新民黨，原來都曾經「違規」到東翼前地遞信。話說當時該黨同公民力量（公記）啱啱結盟，葉太就趁財政預算案公布前，帶埋公記成員向財爺曾俊華遞交請願信。如果根據行政署講法，佢哋仲點可以企定定影相呢？不過，話說回來，自從東翼加設圍欄重開之後，所有團體都冇得入東翼前地，連建制派都冇情講。
卓妮