中環出更：聞坑渠油色變 名媛戒酥皮
台灣坑渠油風波掀起全城恐慌，「毒油」滲透多間食肆及多款食品，城中名人聞「豬油」色變。中華總商會婦委會常務委員華慧娜（Vera）話，用豬油製成嘅酥皮食品潛在危機，今後會全部戒食；副會長莊學山太太吳時就寧願入廚炮製自家豬油，好過假手於人喎。
香港工商界婦女尋日舉行聚餐午宴，撞啱朝早八號風球高掛，一度令午宴膠着，幸好天文台喺中午前改掛「三號」訊號，一眾嘉賓冒雨匆匆赴宴。坐低食飯，Vera率先食幾粒「吸油丸」，佢話不論平日係咪唔好彩食到「毒油」，吸得油分多都怕肥。以前佢愛食台灣產的「太陽餅」，豬油風波後，真係睇見都怕。
莊學山嘆避無可避
仁愛堂前主席張心瑜都話謝絕用豬油炮製嘅酥皮甜點，佢笑言天生不好零食，加上注重健康，明知對身體無益嘅食物，望都唔會望多兩眼，平日只會飲湯水養生。卓妮見保良局前主席梁寶珠清減不少，原來佢每朝以沙律做早餐，新鮮蔬菜配生果，一滴油都唔加，保證唔會食到問題油喎。
不過，「毒油」風波愈演愈烈，莊學山慨嘆避無可避，批評商人為搵快錢太無良心：「乜嘢監管都係假，一個社會如果連良心都無，真係好恐怖。」為令老公食得安心，莊太吳時會用植物油煮餸。遇上某些菜式要加豬油，先會去街市買豬肉切成小塊，落鑊一炒，豬油自然滲出來，用呢啲油就唔使食得心驚驚。
卓妮