政情：北歐考察 葉建源留多幾日
卓妮之前講過，立法會議會聯絡小組委員會於明日出訪北歐三國，進行為期八日嘅考察。原來除咗泛民主派何秀蘭、劉慧卿、黃碧雲及資訊科技界莫乃光四人提早四日出發去玩外，教育界葉建源都改咗機票遲幾日返香港。不過，學聯一早已經宣布會在二十二號起罷課一周，葉建源喺呢個時候離開香港，會唔會畀人話佢唔關心呢件教育界大事呢？
由於議員外訪所有開支都由納稅人「找數」，議員一舉一動都要非常小心，費事被人質疑浪費公帑。葉建源話，佢會留多幾日喺赫爾辛基，只係想考察當地嘅教育政策，又會相約當地國會議員進行交流，並唔係一心去玩，覺得咁樣做一啲問題都無喎。
或未能返港「罷課」
被問到如果佢留多幾日喺赫爾辛基，就唔可以參與罷課行動，葉建源就話，佢一定可以趕返港參與最後幾日嘅行動，就算自己唔喺香港，都一定會透過新聞了解行動進展，唔擔心班學生會搞出事喎。咦，點解佢講嘢咁似罷課期間放大假嘅教育局局長吳克儉嘅？