政情：楊大偉忠告勿心急做老闆
社企文化興盛，但要「企」得住，策略唔少得。夥伴倡自強社區協作計劃諮詢委員會主席蕭楚基早前舉行社企分享會，Green Monday創辦人楊大偉及最低工資委員會成員黃傑龍齊去過兩招。蕭楚基話，搞社企最忌貪心，曾有人入紙想開設集咖啡店、補習社及時裝店於一身嘅社企，因為欠焦點，不獲委員會撥款。亦有老闆因欠缺財務知識，社企最終關門大吉。
楊大偉推動素食文化極成功，佢忠告年輕人先打工吸收社會經驗，唔好急於做老闆，事關多啲撞板，自然知道應該走邊條路。黃傑龍就提醒有意入飲食業嘅人咪太樂觀，事關行業競爭好激烈，佢提議可以開設「另類薦人館」，即培訓弱勢社群人士然後推薦畀食肆，相信將大受歡迎。「夥伴計劃」過去八年資助逾一百六十間社企，當中有八成喺三年資助期完結後仍然存活。