政情：公民講場：五區變九區「志」驚連任危

本報尋日獨家引述權威消息指，來屆立法會選舉擬由原本五個直選選區改劃為九個，每區議席亦由五至九個減至三至五席，此舉是福是禍對各黨派仍係未知之數。不過，民主黨立法會議員胡志偉就搶先喊苦，話咁劃區有利坐擁強大配票機器嘅建制派，泛民議席必定減少。胡志偉感受到「劇震」亦不無道理，皆因出身黃大仙嘅胡志偉有可能要同隸屬九龍西嘅九龍城合併，眼白白送走觀塘票倉畀西貢區，連任自然勢危，難怪震騰騰搶先喊驚。