政情：「吳得掂」放假 楊潤雄焗對罷課
專上學生團體發動本月二十二日起罷課一周，學民思潮又跟風呼籲中學生罷課一日，但教育局局長吳克儉（吳得掂）話之你，定咗本月十六日至二十四日放大假九日，佢就逍遙喇，難為佢嘅副手、副局長楊潤雄（Kevin）要頂硬上，喺罷課期間面對可能出現嘅棘手問題。
局長話早定假期
究竟吳得掂係避政治風頭？定係怕再度孭鑊呢？據聞佢過去兩年放假少於假期嘅一半，今次假期亦早喺六月部署，先係避小一派位、後尾又驚八月尾九月初係佔中高危期，點知定晒假期後學聯至公布罷課時間。吳得掂已經向同事講明，有乜情況隨時通報，佢都預咗有大事即銷假提前現身喎。
雖然吳得掂叫做解釋咗，但作為佢副手嘅Kevin就要焗擔大旗，署理局長工作，喺政府體系打滾咗二十多年嘅Kevin表現點？好快就有答案！
不過，圈中都有人講笑，話傍住個咁嘅上司，真係唔知係好彩定唔好彩喎。