食白飯都咬崩牙？雖然聽落好不可思議，但真係畀愛港之聲高達斌遇到。尋日我哋見高達斌前面門牙甩晒，細問下先知佢去年喺餐廳食飯時，碗飯入面竟暗藏欖核，佢一唔小心就咬親下顎前排牙齒。開頭只係一隻牙鬆鬆哋，點知甩咗第一隻後就好似火燒連環船咁，甩足四隻。最近佢打算鑲番四隻牙，但牙醫話牙床太低，要墊高先可以鑲，結果搞咗幾個月，預料下個月先可以正式鑲番四隻牙。高達斌話，連同本身有問題嘅大牙，佢睇牙醫使咗十幾萬元喎！唔知佢會唔會「肉痛」多過牙痛呢？
（馮惠詩攝）
