政情：吳明欽女兒出道 挑戰「門常關」
經過近兩個月大興土木，政府總部東翼公民廣場正式「門常關」，曾經鬧爆公民廣場加建鐵欄係「極低能」嘅立法會議員何俊仁（AV仁）尋日拉埋駐紮公民廣場七個月嘅牧師Bob Kraft，宣布就工程提出司法覆核，與AV仁同行嘅仲有一位靚女大律師，原來佢係已故立法局議員吳明欽女兒吳思諾（Senia）。
修畢法學碩士做大狀
生得好標致嘅Senia話，佢喺倫敦政治經濟學院（LSE）完成法學碩士課程，修讀人權法，五月先正式取得執業資格，今次亦係佢「處女下海」第一單全程跟足嘅案件。
AV仁同吳明欽係莫逆之交，上次AV仁參選特首時，Senia就曾出席造勢大會為佢站台，眨吓眼世姪女已經榮升大狀，唔知AV仁有冇過兩招畀Senia？AV仁笑笑口話，Senia係青出於藍，仲話如果單案打到高等法院，要幫佢「企起身」，皆因本身係事務律師嘅AV仁，喺高院同終審法院都冇發言權。至於會唔會申請法援，AV仁話，對案件非常有信心，「話唔定政府賠錢畀我哋添！」