政情：詠春加泰拳 陳慧蕊激減廿磅
新時代女士最緊要身形靚，但係要保持體態都唔係咁容易。香港女律師協會前會長陳慧蕊（Anne）亦試過唔同方法瘦身，但都冇乜成效。早排為演出舞台劇，開始搵教練操練泰拳及詠春，意外地半年激減二十磅，連囝囝都讚佢依家好靚喎！
演舞台劇籌款
Anne話，早前佢為咗幫香港善導會籌款做舞台劇，客串演出武打角色，於是開始搵教練學泰拳及詠春，點知練練吓就見到減磅成效，所以愈練愈興起。最初佢練咗一套動作，但係朋友睇完短片後話顯得佢有啲粗魯，佢聽完之後好想辭演放棄，亦冇晒心機學拳。
幸好佢嘅詠春老師幫佢重新排過一套新動作，將中國武術嘅優雅美態融入泰拳爽快嘅招式之中，結果唔止朋友讚好，連導演都諗住繼續搵佢客串添！依家Anne成個人輕晒，面對美食當前就唔使就住喇，事關勤做運動之後，唔使戒口都一樣可以咁弗。