政情：老鴿「去飲」賴低乳鴿
佔領中環三子雖然無講明幾時開始佔中，但佢哋近日以「去飲」做暗號，話假日遊行完後「去飲」，可以估到佢哋已經揀咗喺十月一日正式開展佔領行動。由於今次活動係整場民主運動嘅重頭戲，好多泛民老將都誓要參與，包括有白鴿黨主席劉慧卿（卿姐）及一眾老鴿，但為免老鴿「去飲」期間不幸被捕，聽聞白鴿黨已制訂好成盤應變計劃，包括唔准乳鴿「去飲」，確保黨嘅運作不受影響。
白鴿黨喺上次政改關鍵時刻臨時轉軚，背負罵名多年，所以今次佔中佢哋參與決心非常堅定，連同卿姐在內嘅白鴿黨議員表明參加佔中。只不過今年七一遊行後預演佔中，警方事後大規模拘捕逾五百名示威者，雖然最終並無起訴任何人，但警方一早揚言會採取果斷嘅策略，令唔少泛民中人認定警方一定會清場並拘捕示威者。
羅健熙隨時擔大旗
俗語有話，蛇無頭不行，由於警方有權扣留示威者長達四十八小時，為免所有黨中委被警方扣留，令白鴿黨陷入真空狀態，近日佢哋制訂咗一系列應變措施，三十位中委有至少九位唔會「去飲」，避免一鑊熟。有份「去飲」嘅除咗五位立法會議員外，仲包括前立法會議員張文光、黃成智、楊森及李永達等人，而「乳鴿」方面就包括鄺俊宇、柯耀林及尹兆堅等人。至於無份「去飲」就有副主席羅健熙、南區區議員區諾軒、東區區議員趙家賢及黎敬瑋等人。一旦卿姐同副主席蔡耀昌不幸被捕，羅健熙就要喺出面統領大局，按章召開中常委會議。
據聞應變措施仲建議「去飲」期間，若有人要簽發支票，可以由唔「去飲」嘅秘書長或者司庫先行簽名，再由羅健熙把關簽第二個名，保證成個黨可以繼續運作。除咗白鴿黨外，公民黨同工黨都已經制訂緊應變措施，費事到時臨急臨忙，乜都做唔切。