中環出更：籌款 獻唱 眾樂樂
歌聲造就美麗人生，一班熱愛音樂嘅城中名人以音符燃亮年輕人，早前舉辦第二屆「眾樂樂」慈善音樂會，為「樂兒計劃成長基金」籌款。當晚，歌星名人輪流上台獻唱，香港專業及資深行政人員協會成員容海恩一口氣唱三首歌，中氣十足。博愛醫院副主席陳李妮（Lily）怕羞無上台，但就捐助五萬元贊助人哋開金口。
話明與眾同樂，除名人表演外，七十位曾參加音樂培訓計劃嘅學生亦粉墨登場。基金會發起人之一嘅李煥明（Wendy）與音樂總監麥皓輪（Holun）輪流為佢哋伴奏，彈足一晚。Holun過去幾年一直為將軍澳及天水圍兩間中學擔任義務音樂老師，透過計劃協助家境清貧嘅學生買樂器，又免費教授演奏技巧。
參加培訓 學生脫胎換骨
睇見班學生脫胎換骨，暑假不再喺街頭遊蕩，寧願返學校練習，Holun都大感欣慰。參加計劃嘅學生背後各有故事。有學生上台時窮得連一件「見得人」嘅衫都冇，仍自信地穿着校服上台；亦有學生因緊張胃抽筋，唱到面容扭曲。但班名人喺台下熱烈打氣，齊齊唱足四粒鐘唔捨得走，歌星呂珊都來撐場，即興唱番首《順流逆流》助興。
Lily為撐音樂會籌委會主席譚浩瀚，食完晚飯來聽歌，即場捐出五萬元支持，一晚合共籌得逾四十萬港元，Wendy話，明年一定再來過，期望更多善心人士贊助表演場地。Holun就話會招攬更多中一學生加入音樂培訓，希望明年培育夠一百人。
卓妮