政情：楊哲安籲管理人才衝出香港
香港競爭力不斷下降，前景令人憂慮。投身獵頭公司擔任執董嘅教育局前政治助理楊哲安（Jeremy）就寄語高層管理人放低包袱，衝出香港博一鋪。做得「獵人」多，Jeremy睇住唔少打工仔在職場平步青雲，但更多人嘅事業到咗「樽頸位」的時候，往往「高不成低不就」。
Jeremy話，香港人語言能力強，夠拚搏，上位好易，但講到坐正跨國大企業嘅阿頭位，就行人止步。有見及此，佢建議管理人將搵工大門打開，衝出香港，到內地或其他國家工作，好似中東唔少地方近年就頻頻向香港工程界專才招手，幫手到當地大興土木，放洋工作之後，唔少人身價當堂三級跳。
須培養學生國際視野
做過官員嘅Jeremy，三句不離老本行。佢認為，香港有條件成為亞洲最大嘅人才輸出庫，但大前提係，要加強培養香港學生的國際視野，例如增加出外交流學習或培訓。呢番分析，大家係咪認為值得深思呢？