立法會放暑假近尾聲，但多個事務委員會嘅外訪計劃排緊隊出發，好似議會聯絡小組委員會下周一將出訪北歐三國八日。
不過，何秀蘭、劉慧卿、黃碧雲（一舊雲）及資訊科技界莫乃光（Charles）竟然冇吸取同事去年接受航空公司款待免費遊法國嘅教訓，竟然改機票提早四日出發去赫爾辛基，仲明目張膽承認四日行程百分百「純玩」喎！
據知四人自組北歐「純玩團」均獲立法會海外職務訪問津貼資助，加上唔使錢改機票，所以四日行程唯一額外開支就係酒店房租，真係攞正牌使公帑順便去玩。四人喺政改敏感時刻無端端提早四日歐遊，唔通又去勾結外國勢力？
我哋問過一舊雲，佢話純粹想早啲過去玩吓，絕冇任何官式或非官式訪問，仲透露對北歐設計有興趣，要到當地「考察」吓。委員會主席劉慧卿亦否認提早「外訪」，被問到點解唔叫多啲議員加入？卿姐哈哈大笑，只係話「你估個個都咁得閒咩！」係囉，點解你哋又咁得閒去玩嘅？