政情：鄭耀棠民望講多「挫」多
人大常委會上月底就特首普選定下框架，唔少建制派中人都急急叫泛民主派以至社會各界「袋住先」，其中部分人係行政會議非官守議員。香港大學民意研究計劃尋日公布最新一期行會成員民望，曾經出口撐政改嘅成員評分都無一幸免下跌，當中以工聯會鄭耀棠評分跌得最甘，係二○○三年七一遊行之後嘅新低。相反，冇乜出聲嘅召集人林煥光（WK）就係唯一民望上升嘅成員，唔通真係「悶聲發大財」？
港大民研上月底向市民提問，喺未經提示下講最多五名行會成員，最多人識嘅係立法會議員葉劉淑儀，之後依次序係羅范椒芬、李慧琼（Starry）、WK及鄭耀棠。之後再喺八月廿八日至九月三日，即係人大常委會公布普選框架前後，叫市民對呢五位成員評分，WK獲五十二點八分，比三個月前升兩分，係五人之中唯一分數上升嘅成員。不過，鄭耀棠就下跌一點六分至四十點七分，在頭五位屬包尾。
鄭破○三年以來新低
鄭耀棠唔單止包尾，評分仲跌至○三七一以來嘅新低。睇番之前佢話泛民請中央食檸檬，食得多會胃酸過多，更講過提名委員會界別分組「可以改動只係呃人」，雖然呢個講法或者係事實，但講到出口就自然火上加油，搞到市民合合，真係「笨人出口」！相對似乎冇出聲撐過政府嘅WK，「潛水」多時，姑勿論佢係咪支持人大決定，起碼唔做唔錯就自然加分，但佢身為召集人咁錫身，仲有乜作用呢？
至於其餘成員，就以羅范椒芬跌得最厲害，跌咗五點六分，葉太同Starry就分別跌四點二及三點三分，全部都係上任以來嘅新低。羅太早前話政府好細微嘅事都要經立法會撥款通過，仲話係「拖住政府後腿」，希望特首普選後「畀多啲空間行政機構」，唔知呢番言論係咪拖低佢民望嘅原因呢？至於葉太同Starry，人大公布當日即刻企出嚟撐場，又係咪失分嘅原因呢？