中環出更：阿彪兩遊斯國 仍與鯨魚緣慳
立法會下月初就放完暑假復會，一眾議員終於要修心養性開始工作。立法會議員鄧家彪（Bill）在休會期間都有同家人去旅行，但地點唔係歐美等熱門旅遊勝地，反而係去年已經去過嘅斯里蘭卡。
冬天先會有
阿Bill去年暑假同老婆、囡囡一心去斯里蘭卡旅遊兼賞鯨，但因為賞鯨季節在冬天，所以同鯨魚緣慳一面。不過，今年佢哋暑假出發依然睇唔到鯨魚，為乜要去多一次呢？
阿Bill話，佢本身都唔係好想再去斯里蘭卡，但五歲大嘅囡囡一聽到去旅行就話要去斯里蘭卡，又話要睇去年錯過咗嘅鯨魚喎。
雖然心知去到一樣睇唔到鯨魚，但喺囡囡苦苦哀求之下，加上佢兩公婆去邊度都無所謂，於是一行三人又再去多次斯里蘭卡。
結果今次十幾日嘅行程，一條鯨魚都見唔到，淨係見到去年夏天已經睇過嘅海龜。不過，一向樂天嘅阿Bill仍然話無所謂，事關斯里蘭卡風景優美之餘天氣又好，加上遊人唔多，作為度假地方算係唔錯喎。
卓妮