中環出更：盧寵茂買喇叭「白」行一趟
港大醫學院外科學系系主任盧寵茂平時着起醫生袍開記者會就見得多，但行街買嘢就比較少見。卓妮早幾日「迎月」就見到一身輕便裝束嘅盧寵茂同太太在中環ifc商場行街拍拖，期間入咗一間電子產品嘅店舖，原來佢哋想買一個無線藍芽喇叭放喺屋企播歌。不過，見佢哋同店員傾咗幾句之後，似乎冇嘢揀啱，再睇咗一陣之後就轉身離開喇！
身為「肝臟權威」嘅盧寵茂，對於處理平日工作壓力及繁忙緊張嘅情緒，除咗放假時陪太太行街外，佢話會經常喺屋企聽音樂當作休息，紓緩兼放鬆一吓心情。
當日佢就正正想搵一個藍芽喇叭，方便喺屋企聽歌用。不過，點解要用藍芽揚聲器呢？
盧醫生就解釋話，因為家中有一個露台，有時佢想坐喺露台聽歌嘅話，用傳統喇叭就要重新拉線，好唔方便，但藍芽喇叭就可以隨意移動，無拘無束。只要連接到智能電話，就可以鍾意拎去邊度聽歌都得啦！如果放在露台，一旦落起雨上嚟，可以立即將個喇叭收入屋，唔使驚整濕喎！
揀唔啱顏色
不過，見盧醫生同太太企喺店內左揀右揀，最後都係買唔成，主要係顏色揀唔啱。唔知係咪因為做醫生對慣咗白色，所以對白色情有獨鍾，可惜白色冇晒貨，店員有推介過其他顏色畀佢哋，所以佢哋決定遲啲先至再睇過喇。
卓妮