中秋佳節，唔少人都鍾意送禮顯心意，尤其係政界中人，個個都收禮收到手軟。不過，自從反貪風氣盛行，政界收禮風氣收斂，我哋最近翻查過行政會議成員利益申報冊，只發現鄉議局副主席張學明收咗十二盒月餅，港交所主席周松崗就收咗兩盒水蜜桃同火腿，由於禮物金額超過二千元，所以兩人嗱嗱聲向行會申報，避免違規。
話說張學明上月一口氣收咗十二盒月餅，可能佢自知年紀唔細，唔敢食咁多月餅，所以索性將十二盒月餅轉送畀救世軍大埔長者綜合服務中心，都算唔話得。
另一位有申報收禮嘅周松崗，就先後收咗二十個加州出產嘅特大白肉水蜜桃，以及西班牙黑毛豬火腿。但佢只係留部分自用，其餘留畀港交所同事享用。