中環出更：大哥唔撐黃錦輝入「熱廚房」
九龍表行集團董事總經理黃錦成好少講家事，但最近佢出咗本名為《調情》嘅自傳，先至揭開佢有六兄弟姐妹、父母早逝嘅身世。幸好黃家幾兄弟姐妹後來個個事業有成，黃家老六黃錦輝仲係中文大學工程學院副院長添。外界盛傳黃錦輝係籌組中嘅創新及科技局副局長熱門人選，身為大哥嘅黃錦成坦言，唔係咁支持細佬加入熱廚房，事關人在官場，郁親都被鬧，喺學術界發展咪幾好囉！
長兄為父 湊大弟妹
黃錦成話，佢廿六歲嗰年父親突然離世，留低佢哋七個兄弟姐妹，其中最細嘅弟弟先十一歲，排尾二嘅黃錦輝就十四歲。佢係家中長子，惟有擔起照顧手足嘅責任，當時佢正沉醉於飛機工程師夢想，都要被迫放棄。為咗照顧細佬妹，佢決定與相識僅八個月的太太結婚，一齊承擔「長兄為父、長嫂為母」的責任，眨吓眼已四十年。今次出書都係因為覺得欠咗太太好多，所以依家兩夫妻若有爭執，佢都會講少句，笑稱：「因為欠咗佢嘛！」
卓妮