綠色先鋒：「貞」打細算 食物再生
還記得上次親手種植植物時的快樂嗎？煮飯用剩的葱頭、吃完的水果核，通常都會丟棄，但綠色工作室創辦人陳佩貞卻把它們往花盆裏種，讓它們再重生成美味菜蔬。她開辦「再生」工作坊分享令「食物」再現生命力的心得，期望參加者可以更加認識土地及日常食物，同時感受種植的快樂。
「靈感來自喺外國嘅朋友，佢想煲五行湯，但係搵唔到其中一種材料蘿蔔葉，於是朋友就攞個蘿蔔自己種。」啟發自朋友的做法，綠田園基金導師阿貞以廚餘再種植成食用菜蔬，同時，她眼見單親低收入家庭的「開心指數」相對較低，六年前開始與農場及社區中心合作開辦工作坊，分享於家居種植剩下的葱、薑、番薯、水果等植物的心得，「低收入家庭無咩活動，但係種到嘢之後睇得出佢哋心情唔同晒！」
工作坊教單親家種植
「買餸搭嗰棵葱，用剩嘅葱頭插番落泥，好快又生番出嚟！」阿貞謂葱生長速度快，而且用途多，因此種葱最受家庭主婦歡迎。她舉例，製作香茅豬扒的香茅、薑等均可以再種，而蘿蔔及龍眼的觀賞性則較高，亦適合於家中種植，「龍眼種幾年就可以有棵樹仔，佢嘅花係粉紅色，好靚，不過就唔會有龍眼食。」
「種薑要先放一半泥落個盆，再放薑，因為之後薑大咗要再加泥，畀空間佢生。」阿貞提醒，不同季節所種的葱及薑味道亦有所不同，「春、夏種嘅係白葱，秋、冬種嘅係紅葱；薑要種耐啲，夏天就收子薑，冬天就收老薑。」阿貞坦言最喜歡火龍果，因為火龍果剛長出的子葉會密集生長，並在日後長成小仙人掌的模樣，「將啲種子排密啲咁種，睇到啲葉密麻麻咁生出嚟，我叫佢做『桌上森林』。」
「依家香港人一年四季都有生果食，好少人理到底食緊嘅生果，係來自邊度同咩氣候環境。」阿貞表示，一個地方水土種出的植物，其實最適合當地人食用，以香港本土的梅梨為例，最適合本港亞熱帶氣候食用。阿貞希望在市民心中埋下種子，令港人開始關注環境及自己身體需要，作出最合適的選擇，自製開心，「啲材料全部都可以唔使錢，去執人哋唔要嘅爛水果，菜頭菜尾種就得，快樂從來都唔需要用錢！」
圖︰關萬亨／文︰胡蔣明