花園違規遛狗踩車嚴重
「啲人晚晚都喺度放狗，搞到成個公園臭晒！啲職員又唔理，我叫佢哋唔好喺度放狗，佢哋仲叫啲狗吠我！」瞿先生習慣於晚飯後到附近的屯門海濱花園散步，經常發現有人在花園遛狗及踏單車，狗隻更隨處便溺影響環境衞生。瞿曾多次向康文署投訴，不過情況一直未有改善。
康文接廿投訴 僅一檢控
康樂及文化事務署發言人表示，屯門海濱花園嚴禁攜帶狗隻或單車進入場地，該署已在花園各出入口張貼告示，提示市民有關規定。一旦發現有人違規攜帶狗隻或單車進入花園，會即時勸喻離開，凡拒絕合作者，職員會因應情況考慮提出檢控。過去一年，該署曾接獲二十宗有市民攜帶狗隻或單車進入場地的投訴，期間進行五次執法行動，並曾提出一次檢控。
「係有警告牌，但就冇人理我先要投訴，戙塊牌但冇人檢控啲人點會理！」瞿先生坦言不滿康文署的回應，要求康文署派員長時間駐守，以便檢控違規人士。