政情:政改框架公布冇護航 紀念抗日勝利冇參加 貪曾玩失蹤

全國人大常委會日前公布香港政改框架,特首梁振英及現任高官當然要力撐啦,就連前特首董建華都出動大鑼大鼓為政改決定護航,反對「佔領中環」同學生罷課等激進行動。當各界空群而出為政改發聲嘅時候,「貪曾」前特首曾蔭權爵士繼續「潛水」玩失蹤,就連政府首辦「抗日戰爭勝利紀念日」官方儀式都唔見影,好似人間蒸發咁,認真不負責任。究竟貪曾係咪因為身為爵士,參與呢啲行動驚英政府唔高興呢?定係自知已聲名狼藉,費事獻世特登匿埋呢?

傳唔喺香港 又遊山玩水?

香港正值政改關鍵時刻,除咗現屆政府高官之外,唔少前政府官員都先後為政改發聲,力撐人大常委會對香港政改嘅決定。甚至連卸任咗九年、鮮有評論香港事務嘅首任特首、現任全國政協副主席董建華,都要罕有特登喺前任行政長官辦公室召開記者會支持政改,仲堅決反對佔中及學生罷課。不過,曾自稱係「香港仔」、熱愛香港嘅「貪曾」就竟然玩失蹤,從未就今次政改表態及支持中央。

另外,內地年初定咗每年嘅九月三日係「抗日戰爭勝利紀念日」,特區政府今年亦喺當日首次舉辦大型官方紀念活動。政府高官、司法人員、行政會議成員、立法會議員、中央駐港代表、退伍軍人及老董都有去香港大會堂紀念花園出席官方儀式,但同樣都係唔見「貪曾」呢位過氣特首現身。據聞「貪曾」近日就唔喺香港,真係唔知佢又去咗邊度遊山玩水嘞。

莫非「爵士」尷尬 索性匿埋

不過,「貪曾」玩失蹤都可能係另有苦衷嘅,事關佢獲英國授勳爵士,身份尷尬,又可能一舉一動都要聽英國支笛,對於力撐政改或紀念抗日戰爭勝利嘅愛國活動未必敢擅自行動,未得到英國指令前咪惟有匿埋囉。之但係「貪曾」本身都因貪腐醜聞臭名遠播,早已淪為過街老鼠,佢行出嚟話唔定仲會令成件事因為一粒老鼠屎搞壞一煲粥,隨時出現反效果添,所以佢自我隱形,唔好累街坊其實都係一件好事嚟嘅。

第一手消息請下載on.cc東網iPhone/iPad/Android/Windows Phone Apps