中環出更：言行要一致 麥美娟有苦自己知
立法會議員作為公眾人物，一言一行時刻都被市民攞住手機監察，行為有咩唔妥都即時網上見。工聯會議員麥美娟（Alice）上任兩年，形象都算幾正面，但原來有苦自己知。好似前年發生釣魚島主權爭議時，Alice曾要求政府向日本發出黑色旅遊警示以示制裁，結果引起軒然大波，但事隔兩年，Alice為免被人「點相」招話柄，寧願堅持唔去日本。
唔去日本 唔入麥記
除咗唔知幾時先可以解除去日本嘅禁令，Alice連麥當勞（麥記）都暫時唔敢食。Alice身兼立法會食物安全及環境衞生事務委員會成員，早前佢喺問題食品上炮轟過麥記處理不當，即使過咗個幾月，佢都唔敢再踏足麥記，費事被市民捉到正，話佢邊鬧邊食喎！如果將來再有餐廳捲入食品醜聞，Alice咪冇啖好食？
Alice仲話，上任後連打麻雀呢類聯誼活動都唔敢選址酒樓鵲局，要「麻雀腳」陪佢返屋企先敢開枱打幾圈。不過，「食得鹹魚抵得渴」，入得議會都預咗啦！
卓妮