中環出更：六位傑出女士 分享奮鬥故事
香港女工商及專業人員聯會（女工商專聯）尋晚舉行頒獎禮，表揚六位傑出專業女性及女企業家，各有奮鬥故事。代理Leonidas朱古力的黃何淑英（Viola）係得獎人之一。為紀念患有唐氏綜合症去世的獨子，Viola十年前創立兒童中心，輔導有語言障礙的小孩，並將朱古力店的收入，全數捐贈中心作營運費。
黃何淑英 助語障童
經歷喪子之痛，Viola未有怨天尤人，反而同丈夫黃家寧投身社企，助有口難言的小朋友過新生，見盡唔少孩子成功克服語言障礙，與家人抱頭痛哭的溫馨場面，Viola話好欣慰。佢分享成功之道：「做事千祈唔好計較，多啲設身處地體諒別人。」認真愛心爆棚。
港大李嘉誠醫學院副院長（科研）梁雪兒都獲獎，佢丈夫袁兆燦係擔任聖保祿醫院病理部病理科顧問醫生。原來兩人係瑪麗醫院舊同事，因同樣對腸胃癌基因研究有興趣成為戀人，至今拍拖話題都離不開醫學。
得獎名單上，仲有利豐發展（中國）董事兼集團華東首席代表趙麗娟（Susanna），佢單身多年，爸媽催婚無數次，可惜催到口水乾，近年唔催嘞。Susanna坦言，已將自己嫁給了事業，唔會扮蠢來吸引異性：「唉，緣分未到，就算放我喺一堆單身男人入面都無用。」成功女性難有呢份幽默感。
「尊師重道 孝順父母」
籌委會主席麥瑞琼都係傑出女性典範，佢話父母從小教導八字真言，就係「尊師重道，孝順父母」。佢話，如果一個人懂得孝道及情義，不論做人做事都一定成功。會長管胡金愛就話，成功女人背後除咗有好丈夫，唔少得一個好奶奶及一位好外傭，有佢哋做後盾，女人先可以放心拚搏喎。
卓妮