虐畜可囚逾20月
【本報訊】洗衣機虐狗事件在網上各熱門討論區瘋傳，網民紛紛鬧爆洗狗男，有人直指他行為可怕，恐會危害市民人身安全：「呢個人已經唔可以用變態形容，佢有極強嘅謀殺傾向！」又有網民指：「有研究顯示，這樣對待動物的人，是沒有同理心，對人亦會一樣冷血。」有網民聲稱已報警，希望警方盡快將他繩之以法，坦言：「希望唔好只係罰錢，用錢解決到嘅話只會變本加厲。」
執業大律師陸偉雄指出，倘涉案男子只上傳相片，可向警方辯稱：「唔小心跌咗落去，意外嚟！」警方不能抹殺意外的可能性，故未必有足夠證據落案起訴。即使他被控告虐畜，仍可向法官求情稱：「我年少無知，唔知咁嚴重！」法官或會從輕發落。
自行招認不為人知秘密
然而，他曾在網上留言稱：「第二次洗時，拿出來五分鐘就意外死咗。」自行招認不為人知的秘密，亦證明他曾多次試圖將活生生的狗隻弄死，其行為早有預謀，並說：「咁即係專登嘅，冷血嘅，冇得求情，冇減刑理據。」一般虐畜個案，刑期可由數個月至廿多個月，而法官會以冷血作判刑準則之一，一旦上述個案屬實，或被重判入獄廿多個月。