政情：公民講場：加薪抝餐飽 公僕搬龍門？

公務員薪俸及服務條件常務委員會（薪常會）尋日同公務員團體開會，討論工會係咪接納薪酬水平調查結果。其中月逗五萬至十萬元人工嘅高級公務員，就因為薪酬水平跑輸私人市場約七至八個百分點，按現行機制或可獲加薪百分之二至三。不過，包括華員會副會長利葵燕等中低級公務員工會就反指，調查喺百分之五「劃線」太粗疏，話薪酬調查一般都有幾個百分點嘅誤差，建議將正負差距定喺百分之十喎。隨時冇得加人工嘅高級公務員協會主席陳世炯就反駁指「冇理由入咗波先劃條界」，質疑有「搬龍門」之嫌。