律師會前會長林新強（Ambrose）早前發表力撐「一國兩制」白皮書嘅言論惹來爭議，律師任建峰（Kevin）等人早前對Ambrose提出不信任動議並獲通過，Ambrose事後自行宣布辭職，原本諗住下年先接任嘅副會長熊運信（Stephen），因而提早坐正做會長，尋日更首次擔大旗率領律師會一眾理事同京官會面，Stephen會後面對傳媒時小心翼翼，似乎唔想頭炮有任何差池出現嘞！
不過，Stephen小心駛得萬年船係一件好事，據聞Kevin等人有意成立關注組，留住一班「倒林」律師做好監察，盼年輕律師製作教材，向新一代講解法治、司法獨立嘅重要性。
另外，最近多事之秋嘅律師會，尋日有好消息公布，就係選出○五年加入理事會嘅彭韻僖（Melissa）成為新任副會長，成為律師會成立一百零七年以嚟首名女副會長。資料顯示，Melissa做過兩屆委任區議員，又獲政府委任多項公職，唔知Melissa下一步會否有意締造歷史，成為律師會史上首名女會長呢？