政情：霍啟剛：青奧激過奧運
剛剛結束嘅南京青年奧運會（青奧），香港隊取得好成績，港隊代表團長霍啟剛話，其實青奧仲分分鐘刺激過奧運，因為運動員嘅技術水平不相伯仲，好多時都鬥得難分難解。例如其中一場劍擊團體賽，港隊本來落後好多分，但後段靠技術同意志反勝，所以嗰場亦係佢個人認為為最刺激同緊張嘅比賽。
囝囝練跳水有得諗？
既然劍擊咁刺激，啟剛有無諗過叫囝囝大個後學劍擊呢？佢話運動呢樣嘢無得迫，最緊要由囝囝自己發揮。不過，當佢講到囝囝會否好似媽咪咁練習跳水，啟剛話香港地運動場館唔多，但練跳水嘅地方就有九龍公園同維園，都算方便，似乎有得諗喎。
運動呢家嘢，最大敵人永遠唔係對手，而係自己嘅傷患，立法會議員林健鋒位公子林凱章（Victor），早前踢波受傷，到現時都未完全康復，本來只要做多啲物理治療同戒口就好番，點知佢自爆最近一時大意，同朋友食飯時飲咗半杯紅酒，結果腳傷再次復發，令佢知到戒口好緊要，現時食飯都要食得好清淡喎。