政情：今日你上鏡：詩姐淑清真朋友

究竟政治人物係咪無乜真心朋友呢？未必，好似基本法委員會副主任梁愛詩同全國政協常委伍淑清，兩人未婚兼不時以「孖公仔」出席公開場合。尋日兩人咁啱又出席同一場合，展現出極為合拍嘅默契，例如兩人離場時，伍淑清自動波幫詩姐拎住啲個人物品，等詩姐可以輕鬆接受記者訪問，到詩姐講完未夠兩句，伍就一個箭步走去電梯定掣，詩姐亦好合拍，講多兩句就收口，轉身走入電梯，而伍為咗詩姐順利進入唔怕夾親，亦用手攔住電梯度門。當詩姐步入電梯後，即時向伍報以微笑，睇完成個過程，呢啲咪叫真正好朋友囉！