政情：陳淑莊拒超選 玩殘公文袋
明年就係區議會選舉，唔少政黨都為選舉做緊準備工作，如果有意在一六年立法會選舉參選超級議席嘅話，就要在區選取得「入場券」。公民黨（公文袋）陳淑莊（Tanya）雖然連任港島區直選失敗，但近年熱衷於話劇等文化工作，經常曝光，所以該黨就有意叫Tanya轉戰超級議席。不過，Tanya就扭扭擰擰，堅持繼續參選港島區，玩殘公文袋之餘，隨時令黨友陳家洛嘅議席不保。
前年立法會選舉中，民主黨（白鴿黨）派咗涂謹申同「AV仁」何俊仁參選超級議席，民協就由馮檢基上陣，結果三人順利當選。外界認為，如果公文袋都派人去選超級議席嘅話，結果應該會改寫，事關白鴿黨未必可以取得兩席，又或馮檢基要告別立法會議員生涯，所以公文袋就對嚟緊立法會選舉超級議席蠢蠢欲動。
白鴿杏花邨願讓路
要參選超級議席，首先就要晉身區議會。公文袋原本就鎖定港島中產區杏花邨，畀Tanya出選。該區本來由泛民陳添勝長期坐鎮，但佢在一一年區議會選舉時爆出騙取津貼醜聞，結果輸咗議席。不過，由於該區一向係泛民票倉，所以泛民都唔係冇機會贏返個議席，而白鴿黨亦已同公文袋協調好，話如果公文袋想派人出選，佢哋就願意讓路咁喎。
陳家洛議席凍過水
聞說Tanya喺公文袋開會時就明言既唔會參選區議會，亦唔會去選超級議席。外界就猜測Tanya因為在一一年區議會選舉輸咗畀自由黨陳浩濂，怕再輸多次。再講，就算贏到區議會議席，亦未必一定可以在立法會選舉超級議席脫穎而出，所以Tanya先至縮沙，寧願捲土重來再參選港島區直選。
如果Tanya肯選超級議席嘅話，公文袋在立法會選舉就可以騰出港島區一席，令今屆靠Tanya抬轎而跑出嘅陳家洛就可以競逐連任，但依家Tanya唔肯轉戰超級議席，令陳家洛嘅議席凍過水，睇嚟公文袋都係要重新部署喇。