中環出更：星爺暗寸泛民 「清場係咪要國際標準先」
政改框架已經大局已定，之前泛民主派一味話政改方案要符合國際標準，又話世界上無嘢係無國際標準云云。立法會金融界議員吳亮星（星爺）聽到呢啲言論後特別激氣，佢話泛民講政改就話要國際標準，但如果警察對付示威者時都使用國際標準，分分鐘用催淚彈同水炮喎，到時泛民係咪仲講「國際標準」先？
星爺話，國際標準唔一定係好事，好似唔少歐美國家嘅防暴警察想清場驅趕示威群眾，絕對唔會四個警察抬一個示威者咁簡單，最低限度都出動晒水炮同催淚彈，如果對付一啲手持武器嘅，分分鐘會出動橡膠子彈，咁班泛民係咪想香港去到呢啲「國際標準」呢？星爺咁講又唔係無道理，估唔到佢咁精靈喎。
自爆志願做政治記者
星爺講「國際標準」講得開心，之後又自爆當年畢業時，第一志願係做政治記者，第二志願先係做銀行，但當時因為銀行有職位空缺，先至無做記者呢一行，如果唔係佢話自己應該仲喺新聞行業打滾喎。
卓妮