中環出更：橋底新居 林貝聿嘉讚好
香港地寸金尺土，早前唔少聲音話要善用全港二千幾條天橋底，除咗只係有個別區議員在天橋底開辦事處外，好多都講講吓冇咗下文。香港各界婦女聯合協進會（婦協）主席林貝聿嘉三年前已搵知名建築設計師何周禮（Barrie）設計灣仔鵝頸橋下的婦協總部，結果好評如潮，林太於是再次搵Barrie幫手設計銅鑼灣摩頓台橋底的灣仔體育總會工程，早前兩人相約落去視察，林太開心又滿意。
林太同卓妮講，十多年前當佢出任灣仔區議會主席時，創辦了灣仔體育總會，後來卸任區議會主席後，就接任總會主席至今。佢話，多年來總會一直寄人籬下，沒有獨立會所，後來佢睇中摩頓台橋底下有一個棄置嘅會所，於是向地政總署申請作為總會的總部，搞咗一、兩年先至獲批。後來佢哋又成功向馬會申請捐助四百萬元搞翻新工程，目前已經幾近完成，預計本月底可以入伙。
林太笑笑口話，自從同Barrie在婦協總部重建項目合作後，大家很有默契，婦協項目設計備受讚揚，Barrie亦攞到唔少獎項。早幾日佢見總會工程初步竣工，所以約埋Barrie落去睇吓，佢覺得好滿意。林太講講吓，諗到總會新居落成後可以搞多啲體育活動，勁開心。
設計師指可塑性高
Barrie就話，今次係佢第二個橋底建築設計項目，手頭仲有兩、三個橋底項目，希望以實際行動充份利用高密度都市橋底下的空間，唔係齋吹水。佢話，有啲橋底高度達十幾米，可塑性好高。佢好開心鵝頸橋婦協總部可以拋磚引玉，畀市民知道橋底都可以起得咁靚嘅。
卓妮