有調查發現本港每兩名中學生就有一人有抑鬱症狀，甚至有兩成四同學有輕度至嚴重嘅自殺念頭，當中百分之二人明言「有機會一定去自殺」。
老朽向來對呢類調查一笑置之，皆因青春成長過程，講真，面對一臉暗瘡、兄弟篤背脊、姊妹講是非等等等等，有邊個唔抑鬱，有邊個未曾試過「一念間想死」啊！
有道是：天下安，注意相；天下危，注意將。然則，社會鬱悶煩躁，看來應注意青少年的身心，是否健康愉快，而調查發現大部分青少年都「抑鬱想死」，香港呢個社會肯定有病，且病得不輕也！
其實，老朽「目測」都知，年輕人為前途擔憂，大學學位又爭崩頭，即使有幸入讀大學，家境唔係咁好嘅，貸款讀書，未出來社會做事已孭了一身債，出到來做事，起初薪金不會太高，又要還貸款，唔好話畀屋企，自己夠使夠用都好叻；老朽有世姪大學畢業，今做緊見習工程師，上班話就話朝九晚五，之不過，晚晚開ＯＴ，一周常三、四晚十時才收工，回到家已十一時多，明又拖着疲累身軀上班，你話咁嘅生涯，連女友約食晚飯都推到自己尷尬，向來活潑明朗嘅佢，忽然之間都抑鬱起來，而老朽除了安慰佢：年輕人眼光要放遠些，抵得諗，唔好太計較！勉勵完佢，霎時感到自己都抑鬱埋，認真該煨！我對青春有悔！
想當年，七、八十年代啲大學生，就真係天之驕子喇，畢業前一年已有公司招獵，臨畢業做定兩套西裝，準備去大行見工也！反觀今之大學生，一入學就排隊輪候公屋者有之，未畢業又諗起前路茫茫，買個「窮人恩物」都要四百萬……唉！唔抑鬱都生理失調喇！
年輕人睇唔到前路，一味抑鬱，沒有夢想，又怎會「神明超勝，欣然自得」？獅子山下，奈何只留下政改殘局！