仲有唔夠兩年，又到新一屆區議會選舉，之後又有立法會選舉，所以近呢幾年，政黨為求籌得多啲款項應付選舉，都各出奇招。好似民建聯嘅領導層咁，佢哋喺籌款晚宴賣完字畫，又賣藝，最後籌得天價七千萬元，都咪話唔誇張。之不過，籌款好講噱頭同技巧，手腕差啲嘅話，募捐變趕客，咁就倒米喇！
講緊嘅係公民黨（公文袋），據聞佢哋嘅立法會議員毛孟靜（正盲毛）前年做籌款晚會司儀，就因為亂屈人捐錢得罪咗好多嘉賓同捐款人，包括不時有向各大泛民政團捐錢嘅前海洋公園主席盛智文。
正盲毛咁樣搞一搞，該黨去年再搞籌款晚會時，好多人即刻避之則吉，正盲毛亦自此被公文袋雪藏，唔畀佢再做司儀。
另一泛民政黨民主黨（白鴿黨）亦即將舉行籌款晚宴，該黨去年籌款爆出賣假畫醜聞，今年佢哋依然會有賣畫環節，但係就會非常小心，做足安全措施，包括邀請埋幅畫嘅畫家親自到場監督，等啲捐款人唔使驚再買到假貨！