政情：鬍鬚曾講「解放思想」 胡志偉談房屋供應交換角色?
全國人大常委會就香港政改前途嘅決定尋日出爐，一如所料二○一七年特首普選係一個「高門檻」嘅方案，財政司司長曾俊華（鬍鬚曾）同民主黨立法會議員胡志偉，同日分別喺個人網誌同電台節目發表意見，不約而同鬥「撈過界」。前者選擇唔講經濟、股市、樓市或政府財政等老本行，改為主動大談已故國家領導人鄧小平嘅思想最寶貴精華係「解放思想，實事求是」，呼籲港人要學習並以此為思考政制出路嘅起點；後者一○年提出立法會「一人兩票」方案，尋日於政改關鍵時刻竟然隻字不提政改，反而大談房屋供應嘅建議對策。
繼上周於網誌呼籲大家把握機會落實政改，否則一整代會負上沉重代價，鬍鬚曾尋日繼續「撈過界」談政改，於最新網誌以「解放思想」為題，提到鄧小平係香港回歸祖國嘅旗手，又話香港回歸十七年，再次面臨一個關鍵時候，國家亦進入深化改革重要關頭，鄧小平作為改革開放總設計師，一國兩制創始人，佢生前嘅智慧喺今日仍然有參考價值。
財爺冀政改 「雙贏」
鬍鬚曾其後又話依家係處於政制改革關鍵時刻嘅香港，學習「解放思想、實事求是」，又話要實踐「解放思想」，第一步係不要被固有思考模式束縛，尋找解決問題新角度，嘗試將眼前「零和遊戲」扭轉，變成「雙贏」，佢重申落實一國兩制、港人治港，係香港對鄧小平最好紀念。
另一邊廂，身為泛民一員嘅胡志偉曾提出立法會「一人兩票」方案，令三百多萬已登記選民有一人兩票，之後事隔四年再次面臨政改關鍵時刻，胡志偉於電台節目無趁機再提政改，反而大談本港房屋供應，認為私人市場嘅樓價已超過家庭入息收入所能負擔，強調政府唔應該依靠私人市場提供可負擔嘅房屋畀公眾，希望政府有決心去解決呢個問題喎。鬍鬚曾同胡志偉不約而同「撈過界」，大家嘅思想，都夠晒開放。