中環出更:中小企聚首:睇唔透經濟前景

早前香港大中華中小企業商會舉行成立周年晚宴及就職典禮,好多政商界人士聚首。講起本港零售業淡靜咗唔少,市面上多咗吉舖,租金卻未見回落,眾人都話對經濟前景睇唔透。本身從事飲食業嘅最低工資委員會委員黃傑龍(Simon)坦言,近排聽講唔少酒樓食肆搵人頂舖,顯示業界開始捱唔住,但另一邊廂亦有唔少人入行,而市面上亦確實多咗舖位畀租客揀。香港經濟係前進或後退,似乎正處於轉捩點。

當日到場嘅仲有審計署署長孫德基、懲教署署長單日堅、中華廠商聯合會副會長李秀恒及葵青區區議會主席方平等人,前全國政協雲大棉亦喺長子雲維熹及次子雲維恩陪同下出席,原來佢同商會創會會長雲海洪一家親,大家都係成吉思汗後人。雲海洪笑稱,雖然佢年紀細過雲大棉,但係論輩分,雲大棉要叫佢叔父添!

雲海洪勁呻 孫德基氹番

講完笑,雲海洪就呻話,香港營商環境對商賈巨富較有利,沉默的中小企又經常「被代言」,政府無真正傾聽中小企嘅聲音。孫德基就趁機賣口乖話,佢加入政府後,審計過政府扶助中小企嘅有關基金,發現仲有唔少改善空間,若業界有意見,不妨話畀佢聽,等佢催促吓政府做好啲喎。

將於今年十二月退休嘅單日堅,卓妮見到佢心情勁靚,自然要問吓佢退休後最想做乜?佢話首要任務係好好休息,朝朝瞓到自然醒。不過話口未完,佢又話擔心自己慣咗朝朝七點鐘就起身嘅紀律生活,到時可能都會自然早醒喎!

卓妮

第一手消息請下載on.cc東網iPhone/iPad/Android/Windows Phone Apps