牛池灣：領匯翻新商場一落雨就漏
彩雲商場完成翻新多時，但仍有不少問題存在。黃小姐就指商場每逢大雨過後即不少地方出現滲漏，曾多次向領匯反映，卻未見修葺妥當，「麵包舖出面最嚴重，一落雨就會漏，以前都唔見有水漏，翻新完就開始係咁，真係唔整好過整！」
領匯發言人解釋，有關情況與排水管道有關，已要求清潔承辦商加強清理相關管道，確保能夠迅速排去雨水。發言人強調現時排水效果已有改善，並會繼續留意情況採取適當跟進。
區議員斥如豆腐渣
「每次同領匯反映有問題，佢哋轉頭就話跟進咗，但又唔覺真係有改善到！」當區區議員譚美普斥翻新儼如豆腐渣工程，更指有關位置於天雨時仍要放置水桶，質疑領匯所指的跟進未有成效，要求領匯重新全面檢查，了解根本問題作出改善。