政情：郭偉強想直選 要過兩重山

工聯會栽培 傳接替阿王

眾所周知，工聯會一直都想邁向年輕化，本身係東區區議員嘅郭偉強，工聯會一直有意培育佢出選港島區直選，接替老將王國興（阿王）嘅議席。不過，阿王近年愈戰愈勇，戰意非常高漲，似乎未有意退位讓賢，所以郭偉強要轉戰港島區直選，就要睇超級議員嫻姐台戲點玩法嘞，因為嫻姐嘅去留會產生連鎖反應。

以嫻姐現時地位，基本上點選都贏，但究竟嫻姐會選擇退定留，現時仍然係未知之數。假如嫻姐想退休唔再競逐連任，其超級議席好有可能由阿王頂上，屆時郭偉強先攞到「入場券」問鼎港島區議席。如果嫻姐唔介意被指「老人政治」而想坐多一屆，咁阿王極有可能繼續留守港島區，到時郭偉強只能空降其他選區，贏面低之餘，分分鐘連個氣勢都無埋。

倘失機會 做一屆就拜拜

不過，就算嫻姐決定淡出，將機會留畀後生仔，郭偉強亦要面對另一隱憂，因為會內實在好多後生仔，好似最近就跑出咗有外號「工聯會吳啟華」嘅吳秋北。其實吳秋北已在工聯會服務一段時間，可惜知名度一直偏低，但自從佢因為擔任反佔中大聯盟發言人而人氣急升，雖然大聯盟爆出唔少負面新聞，但吳秋北起碼贏咗人氣，對選舉有一定幫助。

咁點解有工聯會中人想佢落戶港島區呢？原因有兩個，因為吳秋北「左味」唔濃，書生形象較容易吸納中產票源，呢樣亦係該會過往最弱一環，加上吳秋北真係祖籍福建，如果由佢出選港島區，相信可吸納北角一帶福建幫票源。所以郭偉強依家正一吊吊揈，過完嫻姐嗰關，仲要再撼贏吳秋北，先有機會出選港島區，否則佢嘅前途隨時好似會內幾位前立法會勞工界代表一樣，做完一屆立法會就宣告拜拜。