中環出更：搞中學生罷課 學民得把聲
學聯講明，如果人大常委否決公民提名，九月中就會喺八大院校發動罷課，相信罷課如箭在弦。至於主要代表中學生嘅學民思潮，近日都開始放風，考慮喺中學發動罷課，佢哋尋日仲同教協開會，商討罷課細節。不過，中學生唔返學，隨時被指曠課，中學又唔可以鼓吹未經家長同意嘅活動，最終會否變成「雷聲大、冇雨點」呢？
學民思潮召集人黃之鋒尋日喺社交網站話，目前有包括佢在內嘅四十名學民思潮大專成員，將會響應學聯罷課。學民思潮發言人周庭、黎汶洛（Oscar）同教協立法會代表葉建源等人開會，Oscar承認如果趁返學期間罷課，或會被人話係曠課，所以諗過好似反國教集會咁，放學先去大學或政總附近集會。另外，佢又認為好難返咗學又唔上堂，故此諗緊返學戴黑絲帶，當係沉默抗議喎。
葉建源：睇同學是否夠成熟
Oscar又話，中學因校方唔可以鼓吹未經家長同意嘅活動，所以教協只會支援，明日又會同佔中等召開「六方會談」。葉建源都話，中學究竟係全校定個別同學罷課都有爭議，又要衡量同學有冇足夠成熟度，比起身為大人嘅大專生唔同。所以話學民仔學人搞中學罷課隨時得個吉。
卓妮