中環出更：仁愛晚宴小廚神大鬥法
時下小朋友唔止多才多藝，部分仲入得廚房煮得一手好料理。仁愛堂日前舉辦「童心煮力為仁愛」小廚神烹飪比賽暨慈善晚宴，總理及嘉賓們與一班小廚神合作下廚，個個煮得有板有眼。食物及衞生局局長高永文夥拍肥媽Maria Cordero合作炮製「春乳和牛」，腐乳香味傳遍四周；德國寶（香港）副總裁陳嘉賢（Karen）就同小參賽者Kenny齊齊整月餅迎接中秋節。
當晚各位小廚神出盡法寶大顯身手，卓妮見參賽者Stella碟鹽香雞翼香噴噴令人垂涎三尺，主持人問佢要唔要落葱絲，佢就好快回答話唔需要，非常有主見。原來因為佢嘅總理爸爸劉海航好鍾意下廚，所以家中存放咗唔少調味料及食材，搞到佢對煮食都好有天分，經常與哥哥在廚房流連。至於總理張嘉齊囡囡Stephanie就煮蝦膠炒蛋。
製作愛心月餅
另一邊廂，只有四歲嘅參賽者Kenny亦好搶鏡，同拍檔Karen製作愛心月餅時吸引大量嘉賓圍觀。雖然Kenny年紀小小，但好主動爭取參與每項工序，評分時仲老老積積走去逐個拉票，問啲評判覺得好唔好食，被讚賞有領導才能。
至於高永文同肥媽Maria Cordero合作炮製嘅春乳和牛，籌得超過八萬元善款。講到美食，高永文仲非常興奮，話啱啱去完蘇梅島旅行，在當地除咗玩獨木舟外，仲同太太喺公路旁發現咗個街市有隱世美食，包括上湯浸釀苦瓜及豬肉煮筍，令佢食指大動兼回味無窮喎！
卓妮