滲水屋冧石屎險殺婆婆
室內塌下巨型石屎險傷老婦，滲水辦拖拉多年仍未處理！一個位於深水埗鴨寮街、樓齡逾三十年的舊樓疑因長期受滲水影響，導致天花不時有巨型石屎塌下，戶主早前更險「中頭獎」，自此每日皆擔驚受怕，寄望滲水辦能打救小市民，可惜求助多年仍無下文。區議員炮轟當局對或涉人身安全的個案取拖延態度，令小市民求助無門，做法令人失望。
「整過四次啦已經，但係唔使幾耐又再冧過，上次煮飯就有成十斤重嘅石屎突然跌落嚟，差一步就幾乎砸死我，依家呢個位用咗嚟擺雜物，我都唔敢再行埋去！」林婆婆與多名孫兒居於鴨寮街舊樓，十年前已發現天花滲水，曾多次向屋宇署與滲水辦求助，不滿至今仍了無下文，近年更需以膠盆盛載滴水，情況十分嚴重。婆婆又指天花因不斷有石屎剝落，更露出大量生銹鋼筋，家人曾聘專業人士先後進行多次修補工程，惟治標不治本，直言源頭一日未明，噩夢亦不會完結。
區議員問「傷亡誰負責？」
過去六年一直協助林婆婆的當區區議員劉佩玉炮轟屋宇署無視市民安全，「今次就話跌石屎，下次有人命傷亡邊個負責？滲水到依家都仲未解決，業主自己整過冇耐又漏過（水），一定要靠政府先可以搵到源頭，如果唔係一日住喺度一日都有安全隱憂！」劉佩玉坦言不滿當局拖延處理涉及樓宇結構隱患個案，令居民每日擔驚受怕，要求部門盡快處理事件。
滲水辦與屋宇署不但多年來未有協助林婆婆處理滲漏問題，本報就事件向滲水辦及屋宇署查詢，至今逾三個月仍未獲部門任何回應。「依家都繼續搏命冧落嚟，屋宇署仍然係冇人嚟睇過，唔知搞咩鬼，完全唔理阿婆生死！」求助無門的林婆婆直言對政府部門完全死心。面對單位天花石屎隨時塌下，婆婆僅能靠單方面修修補補，更因擔心「中頭獎」而晚晚睡不安寧。
必須盡快找出滲水源頭
「如果有咁巨型嘅石屎冧落嚟，已經係一個好嚴重嘅警號，明顯有即時危險，一定要緊急維修，如果唔係有機會成個樓板冧落嚟！」香港公正行有限公司樓宇檢驗技術總監賴達明解釋，如要徹底解除危機，必先盡快找出滲水源頭，再終止滲水，並在滲漏位置進行維修，包括移除鬆脫石屎，更換鋼筋並作防銹處理，或需進行大型結構性維修，如只作表面維修將治標不治本，無法根治問題。
記者：阮佩君、詹海萍