千呼萬喚，萬喚千呼，講足二十年嘅全民退休保障計劃終於稍有眉目嘞，點知研究報告一出，唔係得到掌聲，而係一片罵聲。梗係啦，港府坐擁金山銀山，既有能力亦有責任做好安老政策，偏偏喺全民退保問題上縮得就縮，卸得就卸，唔畀人鬧爆就奇啦！
受政府委託進行全民退保研究報告嘅港大學者周永新係咁講嘅，建議當局設立全民老年金制度，只要年滿六十五歲，一律可以每月領取三千元，而現時嘅生果金及長者生活津貼則取消。至於錢從何來，報告提出港府一次過注資五百億元，同時引入「薪俸老年金稅」，打工仔及僱主要喺強積金之外供多份，收入愈多供得愈多，供款額由百分之一至二點五不等。
全民退保，人人有責，要市民出一分力，本來係無可厚非嘅。問題係，港府承擔幾多先？一次過注資就闊佬懶理，關人個關，講唔講得通先？正如有人質疑，新稅項唔止增加中產經濟負擔，而且變相由中產人士供養無工作嘅人，有違公平原則。咁又係呀，中產對庫房貢獻最多，福利最少，家陣開徵新稅又搵中產開刀，條氣點會順吖！
聽吓市民點講啦。「東方報業民意調查」顯示，對於全民退保要打工仔每月額外供款，四成受訪者直指令打工仔百上加斤；兩成八認為是低收入工人補貼高收入長者；兩成一表示愈年輕供款期愈長，不划算。事實上，唔止打工仔強烈反彈，商界亦係叫苦連天，事關額外供款勢必增加營商成本，削弱競爭力，有商會仲話不如稍微增加利得稅代替供款好過。商界同打工仔罕見一致，就知道呢個方案問題多多啦。
講來講去，都係港府卸責累事。現時生果金及長生津每年開支約二百多億元，推行全民退保每年都不過係三百多億元，當局只需多付一百多億元就水到渠成，而以港府嘅財力物力，推動全民退保綽綽有餘，可惜吖，當局善財難捨，冤枉甘心，基建超支億億聲，安老一味托手（月爭），簡直不知羞恥。難怪上述民調又顯示，三成二受訪者認為政府應每年注資，減輕僱主及僱員負擔；三成直斥政府承擔少；另外三成批評政府諗縮數。
更離譜嘅係，港府不斷玩「狼來了」嘅把戲，聲稱實行全民退保可能令結構性財赤提早出現喎，擺明靠嚇。有人話當局拋出呢個爭議不斷嘅方案，無非想全民退保名正言順壽終正寢，唔係冇道理o架！
前政務司司長唐唐金句講得啱嘞，做男人要有膊頭，做公職要有腰骨，港府喺安老政策上一味諗縮數，冇膊頭又冇腰骨，係咪男人嚟o架！