自從多個泛民主派立法會議員被指收取政治捐獻而未有申報，其他議員都變驚弓之鳥，申報利益時都變得小心翼翼。我哋近日就翻查過議員個人利益登記冊，發現多名議員都「有殺錯冇放過」，寧願多申報都唔好冇申報，其中議員陳恒鑌（Ben）就更加連杧果同消腫膏都照申報。
阿Ben話呢，喺上月九日百色市招商會送咗五十盒杧果畀佢，以每盒五十元計算，咁即係合共二千五百元。百色市位於廣西，原來仲係「中國杧果之鄉」，相信阿Ben都會大飽口福咁喇。
兩日之後，阿Ben又收到四盒消腫透骨膏，合共三百五十元。佢早前去香港中山隆鎮同鄉會就職禮做主禮嘉賓，又收到價值一千元嘅金馬裝飾擺設。睇番申報，佢仲將三項物品影埋相，真係驚青成咁？
至於獨立議員謝偉俊（Paul）就喺今個月中兩次更新公司股份資料，但睇真啲，佢嘅同事寫錯咗公司嘅中英文名。當申報其中一間投資公司名稱時，就將「天智」寫成「智天」，而兩間公司英文「Princess」同「Corporate」，就串錯成「Princes」同「Coporate」。阿Paul話，自公民黨湯家驊涉嫌漏報事件後，立法會秘書處就好緊張其他議員嘅申報，所以佢都要執番正喎。